ताविल अन्सारी
सुनसरी । स्थानीय सरकार कोशी गाउँपालिका सुनसरीले थप प्रसुति गृह तथा स्वास्थ्य प्रयोगशाला संचालन गरेको छ ।
मातृ तथा शिशु मृत्यु दर न्युनिकरणका लागि ग्रामीण भेगमा संचालन प्रसुति गृह संचालन गरिनु पर्ने धारणाका साथ कोशी गाउँपालिकाले प्रसुति गृह संचालनलाई प्रभावकारी रुपमा अगाडी बढाएको हो । कोशी गाउँपालिका सुनसरीका अध्यक्ष एयुब अन्सारीले वडा नं.५ मा सो प्रसुति गृह र स्वास्थ्य प्रयोगशालाको समुदघाटन गर्नु भएको छ । भौगोलिक रुपमा ठूलो र विकट एरिया रहेकोले प्रत्येक वडामा प्रसुति गृह संचालन गर्ने योजना अनुसार अहिले वडा नं. ५ मा थप संचालन भएको हो ।
यस अघि वडा नं.१ र ७ मा प्रसुति गृह संचालनमा आइ सकेका छन् । प्रसुति गृह संचालनबाट गर्भवति महिलाहरुले शुरुबाट नै स्वास्थ्य चेक जाँच, औषधि उपचार र जौखिममुक्त प्रसुति गराउन मदत पुगि गर्भवति महिलाहरु स्वास्थ्य खतराबाट बच्ने गरेका र यसले ग्रामीण भेगका महिलाहरुको स्वास्थ्यमा प्रत्यक्ष लाभ पुगि रहेको अध्यक्ष अंसारीको भनाई रहेको छ । सो अवसरमा पालिका उपाध्यक्ष अनिता देवी यादव, वडा नं.५ का वडाध्यक्ष शाहजमाल मियाँ लगायतका महानुभावहरुको उपस्थिति रहेको थियो ।
