नेपाली कांग्रेसले नेकपा एमालेसँगको प्रदेश सरकार सहकार्य तोड्ने तयारी गरेको छ।
प्रदेश सरकारहरूमा एमालेको भूमिका र व्यवहारप्रति असन्तुष्टि जनाउँदै कांग्रेसले सातवटै प्रदेशबाट आफ्ना मन्त्री फिर्ता बोलाउने निर्णयतर्फ अघि बढेको हो।
कांग्रेसका शीर्ष नेताहरूबीच पटक–पटक भएको छलफलपछि एमालेसँगको सहकार्यलाई निरन्तरता दिन नसकिने निष्कर्ष निकालिएको पार्टी स्रोतले जनाएको छ। कांग्रेसका एक पदाधिकारीका अनुसार अब सातै प्रदेश सरकारमा रहेका आफ्ना मन्त्रीहरूलाई फिर्ता बोलाइनेछ।
यसअघि नै कर्णाली प्रदेश सरकारबाट कांग्रेसका मन्त्रीहरूले राजीनामा दिएका छन् भने सुदूरपश्चिम प्रदेश सरकारमा एमालेका मन्त्रीहरूलाई हटाइएको छ। कर्णालीमा एमाले नेतृत्वको सरकार छ भने सुदूरपश्चिममा कांग्रेस नेतृत्वको सरकार सञ्चालनमा छ।
अब बाँकी प्रदेशहरूमा पनि कांग्रेस–एमालेबीच भएको सत्ता सहकार्य टुट्ने सम्भावना बढेको छ। कांग्रेसले नयाँ राजनीतिक समीकरण बने सरकारमा रहने र सहमति नजुटे सबै प्रदेशमा प्रतिपक्षको भूमिकामा बस्ने विकल्पबारे छलफल गरिरहेको जनाएको छ।
सत्ता सहकार्यमा आएको यो दरारले प्रदेश सरकारको राजनीतिक समीकरण फेरिने संकेत देखिएको छ।
#NepaliCongress #UML #NepaliUpdate #NepaliNewsToday
