काठमाडौं । नक्कली भुटानी शरणार्थी प्रकरणमा फरार रहेका नेकपा एमाले सचिव तथा पूर्वमन्त्री टोपबहादुर रायमाझी पक्राउ परेका छन् ।
आइतवार साँझ बुढानीलकण्ठको पासीकोटबाट उनलाई नियन्त्रणमा लिइएको प्रहरी उच्च स्रोतले जानकारी दिएको छ ।
वैशाख २० मा पक्राउ पुर्जी जारी भएपछि रायमाझी फरार थिए । अर्घाखाँचीको एक सार्वजनिक कार्यक्रमबाट फर्किएर बुटवल आएका उनी त्यहीँबाट फरार भएका हुन्।
यही प्रकरणमा अनुसन्धानका लागि प्रहरीले रायमाझीका छोरा सन्दीपलाई भने २० वैशाखमा नै पक्राउ गरेको थियो ।
शरणार्थी प्रकरण केही दिन अघि नेपाली कांग्रेसका नेता एवं पूर्वगृहमन्त्री बालकृष्ण खाँण र उनका स्वकीय सचिव पक्राउ परेका थिए । अहिले एमाले सचिव रायमाझी पक्राउ परेसँगै पक्राउ पर्नेको संख्या १३ पुगेको छ ।
यसअघि पूर्वगृहमन्त्री भएका थापाका सुरक्षा सल्लाहकार इन्द्रजित राई, सचिव (तत्कालीन गृहसचिव) टेकनारायण पाण्डे, ललितपुर महानगरपालिका–२३ घर भएका सानु भण्डारी, एमाले सचिव टोपबहादुर रायमाझीका छोरा सन्दीप रायमाझी पक्राउ परिसकेका छन् ।
त्यसैगरी, सोही प्रकरणमा मोरङ पथरी शनिश्चरे नगरपालिका-१० घर भएका केशवप्रसाद दुलाल, पाँचथरको फिदिम नगरपालिका-७ घर भएका टंककुमार गुरुङ, दाङ घर भएका सन्देश शर्मा र मोरङको पथरी शनिश्चरे नगरपालिका-१० का पूर्ववडाध्यक्ष सागर राई पक्राउ परिसकेका छन् ।
कांग्रेस नेता एवम् पूर्वसांसद आङटावा शेर्पा र पूर्व गृहमन्त्री रामबहादुर थापाका छोरा प्रतीक थापा विरद्ध पनि पक्राउ पुर्जी जारी भइसकेको छ । तर, उनीहरु अहिले फरार रहेका छन्।
