काठमाडौं । काठमाडौं महानगरपालिकाले सिंहदरबार, शीतलनिवास र बालुवाटारको फोहोर उठाउन नदिएको विषयमा मन्त्रिपरिषद् बैठकमा गम्भीर छलफल भएको छ ।
सरकारविरुद्ध महानगरका मेयर बालेन (बालेन्द्र) साहले दिएका अभिव्यक्तिहरुलाई लिएर पनि चर्चा भएको थियो । बैठकमा अधिकांश मन्त्रीले बालेनले अराजकता निम्त्याउन खोजे आरोप लगाए ।
उनलाई साइजमा ल्याउनुपर्छ, संघीय सरकार भनेको संघीय नै हो, यसरी अराजक बन्न तल्ला सरकारलाई दिनुहुन्न एक मन्त्रीले खुलेर नै भने बैठकमा सहभागी एक मन्त्रीले जानकारी दिनुभयो ।
सञ्चारमन्त्री तथा सरकारका प्रवक्ता रेखा शर्माले स्थानीय तहले फोहोर उठाउने नीतिगत व्यवस्था रहेको बताउनुभयो । यसलाई सबैले पालना गर्नुपर्नेमा मन्त्रिपरिषद्मा छलफल भएको उहाँले जानकारी दिनुभयो ।
‘बैठकमा सिंहदरबार, बालुवाटार र शीतलनिवासको फोहोर नउठेकोबारे गम्भीर छलफल भयो । यसको समाधानका लागि पहल गर्ने तथा नीतिगत व्यवस्था पालना गर्न गम्भीरतापूर्वक ध्यानाकर्षण गराउने कुरा भएको छ’, उहाँले सञ्चारकर्मीसँग भन्नुभयो ।
बालेनका अभिव्यक्तिहरु अराजकतातर्फ केन्द्रित रहेको विषयमा समेत बैठकमा छलफल भएको शर्माले बताउनुभयो । ‘या त नीतिगत परिवर्तन हुनुपर्छ वा भएको व्यवस्था पालना हुनुपर्छ भन्ने छलफल भएको छ’, उहाँले भन्नुभयो, ‘नत्र त्यसरी बोल्न मिल्दैन ।’
