काठमाडौं । नेकपा एकीकृत समाजवादीका अध्यक्ष माधव नेपालले राष्ट्रपति पायो भने एमालेलाई कसैले छुन नसक्ने बताउनु भयो।
सप्तरीको राजविराजमा शनिबार आयोजित अगुवा कार्यकर्ता भेलालाई सम्बोधन गर्दै अध्यक्ष नेपालले आगामी राष्ट्रपतिको चुनावमा नेकपा (माओवादी केन्द्र)ले सोचविचार गर्नुपर्ने बताए।
“‘सत्ता कब्जा गर्ने दाउ चलिरहेको छ, सभामुख, राष्ट्रपति कब्जा गर्ने, पछि प्रधानमन्त्री कब्जा गर्ने त्यसपछि राज्यका अन्य निकाय कब्जा गर्ने सोचबाट नेतृत्व ग्रसित छ,” नेपालले भने।
एमालेले सभामुख पाइसकेको र अब राष्ट्रपति पनि पाएमा कसैले छुन नसक्ने जिकिर गरे। माओवादी नेताहरूलाई सचेत गराउँदै अध्यक्ष नेपालले भने, “राष्ट्रपति एमालेले पायो भने उसलाई कसैले छुन सक्दैन। यो कुरा माओवादीले बुझ्या छन् कि छैनन्?”
उनले राष्ट्रपतिको निर्वाचन आउन अझै बाँकी भए पनि सोचविचार गर्नुपर्ने बताए। उम्मेदवारका विषयमा पनि छलफल हुन बाँकी रहेको र एमालेमा सत्ता कब्जा गर्ने दाउ चालिरहेको उनको भनाइ थियो।
