विराटनगर । आगामी तीन वर्ष भित्रमा सञ्चालन हुनेगरि सुनसरीको इटहरीमा जलन (बर्न) अस्पताल निर्माणको प्रक्रिया सुरू भएको छ ।
काठमाण्डौं बाहिर पहिलो पटक कोशी प्रदेशमा आगलागीमा घाइते भएका लगायतका बिरामीहरूको उपचारका लागि एक सय शैयाको अस्पताल निर्माण गर्न कोशी प्रदेश सरकार र जनस्वास्थ्य सरोकार ट्रष्ट ( फेक्ट नेपाल) बीच सम्झौता भएको हो । मुख्यमन्त्री केदार कार्कीको उपस्थितिमा स्वास्थ्य मन्त्रालयका सचिव डा. सुधा देवकोटा र ट्रष्टका कार्यकारी निर्देशक डा. गौरी प्रधानले अस्पताल निर्माणका लागि सम्झौता पत्रमा हस्ताक्षर गर्नुभएको छ । ट्रष्टले इटहरी उपमहानगर १८ पकलीस्थित भवानीपुरमा ( फेक्ट नेपाल) ले ७ वर्ष अगाडि खरिद गरेको २ विघा १० कठ्ठा जग्गामा ५० शैया जलन र ५० शैया सामान्य गरी १ सय शैयाको जलन अस्पताल निर्माण गर्न लागिएको हो ।
प्रदेश सरकारले ट्रष्टसँग सम्झौता गरेर तीन महिनाभित्र सो अस्पताल निर्माण सुरू गर्न १ करोड ५० लाख बजेट दिन सम्झौता गरेको छ । ४० करोड लागतमा ३ वर्ष भित्रमा निर्माण सम्पन्न गर्ने लक्ष्य राखिएको सो अस्पतालका लागि आवश्यक थप बजेट आगामी आर्थिक वर्षमा दिने मुख्यमन्त्री कार्कीले प्रतिबद्धता जनाउनुभयो । अस्पताल सञ्चालनका लागि आवश्यक उपकरण र जनशक्ति व्यवस्थापन ट्रष्टले गर्ने कार्यकारी निर्देशक प्रधानले बताउनुभयो । उहाँले प्रदेश सरकारले अस्पताल निर्माणका लागि दिएको अनुदान सहयोग गरे बापत कोशी प्रदेशका बिरामीलाई सहज र सुलभ रूपमा उपचार सेवा प्रदान गर्ने सम्झौतामा उल्लेख छ । उक्त अस्पतालले जलनसम्बन्धी विशेषज्ञ र विशिष्टिकृत सेवा प्रदान गरिने समेत सम्झौता पत्रमा भनिएको हो ।
ट्रष्टले किर्तिपुर नगरपालिकासँगको सहकार्यमा किर्तिपुर अस्पताल, काठमाडौं मोडेल अस्पताल सञ्चालित छ । फेक्ट नेपालका संयोजक कैलाशखाकी श्रेष्ठले काठमाण्डौं बाहिर पहिलो पटक जलन अस्पताल निर्माण शुरु गरिएको बताउनुभयो । उहाँले जलन संवन्धि जनचेतना दिने र आगलागीको घटनामा परेकाहरुको जोखिम हटाउने उद्देश्यले अस्पताल निर्माण शुरु गरिएको बताउनुभयो । उहाँले २४ घण्टा भित्र सेवा नपाएर मृत्यु हुनेहरुको घटना धेरै रहेको उहाँले बताउनुभयो ।
फेक्ट नेपाल नेपालको स्वास्थ्य क्षेत्रमा ३३ वर्षदेखि क्रियाशिल छ ।
