चितवन । प्रतिकिलो पाँच रुपैयाँमा पनि तरकारी बिक्री नभएपछि चितवनका किसानहरु आन्दोलित भएका छन् ।
आज (शुक्रबार) दिउँसो किसानहरुले पूर्वपश्चिम राजमार्गअन्तर्गत नारायणगढस्थित पुलचोकमा सडकमै तरकारी फालेर प्रदर्शन गरेका छन् । अहिले उत्पादित कुनै पनि तरकारीले बजार नपाएकाले बाध्य भएर सडकमा तरकारी फालेर विरोध गर्नु परेको खैरहनीका किसान पुरन महतोले बताए ।
उनका अनुसार टमाटर, बन्दा, गाँजर, केराउलगायत तरकारी पाँच रुपैयाँ पनि बिक्री हुन सकेको छैन । त्यसैको विरोधमा आज ६ वटा ट्याक्टरमा ल्याइएको तरकारी सडकमा फालिएको उनले बताए ।
बजारमा भारतीय तरकारी भित्रिने क्रम बढेकाले स्वदेशी तरकारीले बजार नपाएको किसानहरुले गुनासो गरेका छन् । उनीहरुले प्ले कार्डमा स्वदेशी उत्पादलाई प्राथमिकता देऊ, किसानमारा दलहरु मूर्दावादलगायत नारा लेखेर प्रदर्शन गरेका थिए । चितवनमा उत्पादित धेरैजसो तरकारी काठमाडौं लैजाने गरिन्छ ।
