ओडिशा । भारतको ओडिशा राज्यका स्वास्थ्यमन्त्री नवकिशोर दासको प्रहरी अधिकारीबाटै गोली हानी हत्या भएको छ ।
प्रहरीका एक सहायक उपनिरिक्षक (असइ) ले मन्त्री दासको गोली हानी हत्या गरेका हुन् । छातीमा गोली लागेका दासको उपचारका क्रममा गएराति निधन भएको हो ।
आइतबार दिउँसो पूर्वी ओडिशाको ब्रज राजनगर सहरमा आयोजित एक कार्यक्रमा सहभागी हुन पुगेका दासमाथि गाडीबाट ओर्लिए लगत्तै असई गोपालकृष्ण दासले दुई राउण्ड गोली प्रहार गरेका थिए । मन्त्रीको स्वागत गर्न बसेका मानिसहरुले तत्काल आक्रमणकारीलाई नियन्त्रणमा लिइ प्रहरीलाई बुझाएका छन् । घाइते मन्त्रीलाई हेलिकोप्टरबाट अस्पताल पुर्याइएको थियो । शल्यक्रियापछि गोली निकालिए पनि उनलाई बचाउन नसकिएको चिकित्सकहरुले बताएका छन् ।
आक्रमणकारी असई बाइपोलर डिसअर्डरको बिरामी रहेको र उनले विगत आठ वर्षदेखि यसको उपचार गराइरहेको भारतीय समाचार समिति पीटीआईले जनाएको छ । मानसिक रोगी हुँदाहुँदै पनि उनी मन्त्रीको भ्रमणको सुरक्षा व्यवस्था प्रमुख रहेको र उनलाई सर्भिस रिभल्भर पनि उपलब्ध गराइएको विषयलाई लिएर प्रहरी विभागमाथि प्रश्न खडा भएको छ ।
प्रधानमन्त्री नरेन्द्र मोदी र ओडिशाका मुख्यमन्त्री नवीन पटनायकले मन्त्री दासको निधनप्रति दु:ख व्यक्त गर्दै ट्वीट गरेका छन् । स्रोत: न्युज एजेन्सी
