विराटनगर । कोशी प्रदेश प्रमुखले असार २१ गते बेलुका ५ बजेसम्मका लागि
नयाँ सरकार गठनको आव्हान गरेका छन् । हिक्मतकुमार कार्की नेतृत्वको सरकारले
संसदवाट विश्वासको मत लिन नसकेपछि प्रदेश प्रमुखले अर्को सरकार गठनको
आव्हान गरेका हुन् ।
यसअघि सरकारमा सहभागी दल माओवादी केन्द्रलाई सरकारबाट फिर्ता आउन
काँग्रेसले पटकपटक आग्रह गरेको थियो । काँग्रेसकै आग्रहलाई मानेर माओवादी
केन्द्रले सरकारलाई दिएको समर्थन पनि फिर्ता लियो ।
कोशीमा अहिले संघीय गठबन्धनका आधारमा २९ सिटको नेपाली कांग्रेस, सभामुखसहित १३ सिटको नेकपा माओवादी केन्द्र, ४ सिटको नेकपा एकीकृत समाजवादी र १ सिटको जनता समाजवादी पार्टी (जसपा) एक ठाउँमा छन् । यी चार दलसँग सभामुखसहित ४७ मत छ ।
त्यसै गरी, प्रदेशकै सबैभन्दा ठूलो दल एमाले ४० सिट लिएर बसेको छ भने ६ सिटको राष्ट्रिय प्रजातन्त्र पार्टी (राप्रपा) अनुकूलताका आधारमा सरकारमा सहभागी हुने अवस्था छ । निर्णायक अवस्थामा सभामुखले मतदान गर्ने अवस्था रहेता पनि बहुमतको आधारमा मुख्यमन्त्री दाबी गर्न गठबन्धन दललाई सङ्कट छ । किनकि, मुख्यमन्त्री दाबी गर्ने क्रममा नै सभामुखलाई सामेल गराउने संवैधानिक प्रावधान छैन ।
पछि, मुख्यमन्त्रीले विश्वासको मत लिने क्रममा मत विभाजन हुँदा मात्र सभामुखले निर्णायक मतदान गर्न पाउँछन् । यस आधारमा अहिले गठबन्धनसँग ४६ मत मात्र हुन्छ । यो बहुमत होइन । यस्तो अवस्थामा गठबन्धन दलले कोशीमा नयाँ सरकार गठनका लागि राप्रपाको साथ लिनु बाहेक विकल्प छैन । यदि, राप्रपा पनि सरकारमा सहभागी भएको खण्डमा कोशीमा सरकार पनि बन्ने र वर्तमान प्रदेशसभा पूर्ण अवधि रहने बलियो आधार बन्ने छ ।
