काठमाडौं । राष्ट्रपति निर्वाचन आउँनै लाग्दा कसलाई बनाउने भन्ने विवाद कायम छ । यसबीच लोकतान्त्रिक समाजवादी पार्टी (लोसपा) ले अध्यक्ष महन्थ ठाकुरको नाम प्रस्ताव गरेको छ ।
मंगलबार दिउँसो प्रधानमन्त्री समेत रहनु भएका नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ सँग बालुवाटारमा भेटवार्ता गर्दै लोसपाले यस्तो प्रस्ताव गरेको हो ।
भेटमा लोसपा अध्यक्ष ठाकुरसहितको टोलीले राष्ट्रपतिमा राष्ट्रिय सहमति हुनुपर्ने कुरा उल्लेख गर्दै त्यसका लागि ठाकुर उपयुक्त व्यक्ति भएको बतायो ।
लोसपा नेता शरदसिंह भण्डारीका अनुसार राष्ट्रपति पदमा राष्ट्रिय सहमति हुनुपर्छ भन्ने प्रधानमन्त्री दाहालको कुरामा अध्यक्ष महन्थ ठाकुर पनि उपयुक्त पात्र र उपयुक्त व्यक्तित्व हुनुहुन्छ भनेर भनिएको छ ।
अध्यक्ष ठाकुरको नाम प्रस्ताव गरिएकोबारे बोल्दै भण्डारीले भन्नुभयो, ‘उहाँको नाममा सहमतिका लागि प्रयासका निमित्त प्रधानमन्त्रीजीलाई आग्रह गरेका छौँ ।’ निर्वाचन आयोगले राष्ट्रपति उम्मेदवारको मनोनयन मिति फागुन १३ गते तय गरेको छ ।
