हरिनगर गाउँपालिकामा कार्यालय पोशाक नलगाउने कर्मचारीलाई कार्यालय प्रवेशमा रोक लगाउने कार्यबाहक अध्यक्ष भगतको तयारी
सुनसरी । हरिनगर गाउँपालिकामा कार्यालय पोशाक नलगाउने कर्मचारीलाई कार्यालय प्रवेशमा रोक लगाउने तयारी भई रहेको कार्यबाहक अध्यक्ष रिमझिम भगतले बताएकी छिन् ।
हरिनगर गाउँपालिकाका अध्यक्ष हाजी गफार अन्सारी धार्मिक कर्मका लागि साउदी अरब जानु अघि पालिकाका कर्मचारीहरुको बैठक बसि कार्यालयमा अनिवार्य कार्यालय पोशाक लगाएर आउनु पर्ने , परिचय पत्र अनिवार्य झुण्याउनु पर्ने निर्णय गरिएको थियो तर १० प्रतिशत कर्मचारीले सो निर्णयको पालना गरेका छन् भने ९० प्रतिशतले निर्णयको अवज्ञा गर्दै आएका छन् । कार्यबाहक अध्यक्ष रिमझिम भगत तथा प्रमुख प्रशासकीय अधिकृत समेतले पटक पटक कार्यालय पोशाकमा आउन आग्रह गरिएता पनि अटेर गरि आदेशको अवज्ञा गरेकाले कार्यालय पोशाक विना कार्यालय प्रवेश निषेधको व्यवस्था गर्न लागिएको हो । यसै गरि हरिनगर गाउँपालिकाको नयाँ भवनमा शिक्षा, युवा तथा खेलकुद शाखा , स्वास्थ्य शाखा , समाजिक पञ्जिकरण इकाइ शाखा, पशुसेवा शाखा , कृषि शाखा भाडाको घरबाट आफनै भवनमा सार्ने भनिएकोमा कृषि शाखा बाहेक सबै शाखाहरु व्यवस्थित रुपमा नयाँ भवनमा सञ्चालन भई सकेको छ भने कृषि शाखा अहिले सम्म व्यवस्थित भएको छैन । टिनको छाप्रो रहेकाले गर्मीमा बस्न नसकिने बहाना देखाउँदै नयाँ भवनमा कार्यालय सञ्चालन गर्न चाहेका छैनन् ।
