काठमाडौं । सप्तरीका वरिष्ठ पत्रकार तथा नेपाल पत्रकार महासङ्घका पूर्वकेन्द्रीय उपाध्यक्ष, मधेस प्रदेश मिडिया काउन्सिलका अध्यक्ष शिवहरि भट्टराईको पार्थिव शरीरमा आज अन्तिम श्रद्धाञ्जली अर्पण गरिएको छ ।
मधेस प्रदेशका मुख्यमन्त्री लालबाबु राउत, जनता समाजवादी पार्टीका अध्यक्ष उपेन्द्र यादव, मधेसका अर्थमन्त्री शैलेन्द्रप्रसाद साह, प्रदेश नं १ का स्वास्थ्यमन्त्री जयराम यादव, निर्वाचन आयोगका पूर्वआयुक्त डा अयोधिप्रसाद यादव सहितका शीर्ष नेता तथा उच्च व्यक्तित्वले भट्टराईको गृहनगर राजविराजमा पुगी उहाँको पार्थिव शरीरमा श्रद्धाञ्जली अर्पण गर्नुभएको हो ।नेपाल पत्रकार महासङ्घ शाखा सर्लाहीको ११औँ साधारणसभामा भाग लिन सर्लाही पुग्नुभएको भट्टराईको हृदयघातका कारण शनिबार सर्लाहीमै निधन भएको थियो ।
नेपाल पत्रकार महासङ्घ शाखा सप्तरीमा अध्यक्ष श्रवणकुमार देवलगायतले स्व भट्टराईलाई श्रद्धाञ्जली अर्पण गर्नुभयो । उहाँको शवलाई राजविराज नगरपालिकाको परिक्रमापश्चात कोशी ब्यारेजमा अन्त्येष्टि गरिने पारिवारिक स्रोतले जनाएको छ । रासस
