काठमाडौँ । मङ्गलवार पाकिस्तानका पूर्वप्रधानमन्त्री इमरान खानको पक्राउसँगै देशव्यापी प्रदर्शन चर्किएको छ ।
खानको गिरफ्तारीपछि भड्किएको हिंसामा अहिलेसम्म ८ जनाको मृत्यु भएको छ भने १ हजारभन्दा बढीलाई पक्राउ गरिएको प्रहरीले जनाएको छ।
खानलाई भ्रष्टाचार गरेको आरोपमा गत मंगलबार पक्राउ गरिएको हो ।
प्रदर्शन चर्किरहँदा उनले आफूविरूद्ध लगाइएका भ्रष्टाचारका अभियोगमा निर्दोष रहेको बताएका छन् ।
प्रदर्शन हिंसात्मक बन्दै गएपछि पाकिस्तानका प्रधानमन्त्री शहबाज शरीफले बुधबार राति देशवासीको नाममा सम्बोधन गरेका छन् । उनले हिंसात्मक प्रदर्शनमा नगर्न र सार्वजनिक सम्पत्ति तोडफोड नगर्ने कडा चेतावनी दिएका छन् ।
उनले हिंसात्मक प्रदर्शन गर्नेहरूलाई कडाभन्दा कडा कारबाही गरिने चेतावनी पनि दिएका छन् । खान पक्राउ परेपछि उनको पार्टी पाकिस्तान तेहरिक ए इन्साफका अन्य नेताहरूमाथि पनि धरपकड सुरु भएको समाचारमा जनाइएको छ ।
तेहरिक ए इन्साफ पार्टीका वरिष्ठ नेता शाह महमुद कुरेशीलाई पनि पक्राउ गरिएको अन्तर्राष्ट्रिय सञ्चारमाध्यमले जनाएका छन् । शाह महमुद कुरेशी पाकिस्तानका पूर्व विदेश मन्त्री पनि हुन् । खान पक्राउ परेपछि कुरेशीले आफ्ना समर्थकलाई प्रदर्शनमा ओर्लन सार्वजनिक आव्हान गरेका थिए ।
