सुनसरी । सुनसरीको हरिनगर गाउँपालिका वडा नं.१ स्थित रफु मियाँको घर देखि पश्चिम हुलाकी राजमार्ग जोडने बाटोको कालो पत्रे गर्ने काम सम्पन्न भएको छ ।
दुई वर्ष अगाडी टेण्डर भएको सो रफु मियाँको घर देखि हुलाकी मार्ग सम्मको ९ सय मिटरको बाटो अहिले आएर उच्च प्रविधि युक्त स्फाल्ड प्रविधिको कालो पत्रे सडक निर्माण भएको हो । कुल लागत ५६ लाख ७४ हजार एक सय पाँच रुपैया ८४ पैसामा जल्पापुर मुस्लिम निर्माण सेवाले सो बाटो निर्माण कार्य सम्पन्न गरेको छ ।
सो निर्माण सेवाका संचालक ऐयुब मियाँले आफुले कबोल गरेको रेट र अहिलेको रेटमा धेरै अन्तर अर्थात मुल्यबृद्धि भएकाले सो कार्य सम्पन्न गर्दा आफुलाई २१ लाख जति घाटा भएको बताउनु भयो । हरिनगर गाउँपालिकाका अध्यक्ष हाजी गफार अन्सारीको घर नजिकैको सो बाटो बनाउन निकै ढिलाई हुँदा गाउँघरका मानिसहरुबाट अध्यक्ष आलोचित बन्न पुगेका थिए भने अहिले बाटो कालो पत्रे भए पछि हर्षित भएका छन् । सो सडकको दुवै पट्टि खाल्डो रहेकाले चाँडै सो बाटोको दुवै पट्टि माटो पुर्ने काम सम्पन्न गरिने अध्यक्ष अन्सारीले बताउनु भएको छ । यसै गरि हुलाकी सडक देखि विजी हस्पिटल जाने बाटोको दुवै पट्टि माटो पुरेर सडक फराकिलो बनाई कालो पत्रे गरिने समेत अध्यक्ष अन्सारीले जानकारी दिनु भएको छ ।
