काठमाडौं । प्रधानमन्त्री पुष्पकमल दाहाल ‘प्रचण्ड’ले आफू छिट्टै भारत भ्रमणमा जान लागको बताएका छन् ।
प्रधानमन्त्रीले आफ्नो यस कार्यकालको पहिलो विदेश भ्रमण राष्ट्रको हितमा हुने बताए ।
नरबहादुर कर्माचार्य स्मृति प्रतिष्ठानले शनिबार आयोजना गरेको कार्यक्रममा प्रधानमन्त्री प्रचण्डले भने, ‘छिटै छिमेकी देशको भ्रमण हुँदैछ । त्यसको तयारी राम्रो गरिएन भने राष्ट्रको हित, स्वार्थ व्यवस्थित तरिकाले राख्न सकिएन भने अफ्ठ्यारो आउनसक्छ । त्यसको हामी तयारीमा छौं ।’
प्रधानमन्त्री प्रचण्डले कम्युनिष्ट आन्दोलनलाई सही विचारका आधारमा डो¥याउने प्रयास गरेको तर सफल नभएको बताए । कम्युनिष्टहरूले ल्याएको दुई तिहाई बहुमत बचाउन नसकेको बताउँदै अध्यक्ष प्रचण्डले त्यसलाई किन बचाउन सकिएन भन्ने सवालमा त्यसको जिम्मेवारी सबैले लिनुपर्ने बताए । अहिले कम्युनिष्टहरूको समूह धेरै भएपनि जनतामा लोकप्रिय कम्युनिष्ट पार्टी नै रहेको उनले बताए ।
उनले अझै कम्युनिष्ट पार्टीबीच एकताको सम्भावना रहेको बताए । सबैले एकता र सहकार्यका लागि नयाँ संकल्प लिनुपर्ने बताउँदै उनले सिद्धान्त र विचारमा प्रतिवद्ध रहेर कम्युनिष्टहरु एक ठाउँमा आउनुपर्ने आवश्यकता रहेको बताए ।
कम्युनिष्ट पार्टीको नेतृत्वमा सरकार बन्नु अवसर भएको बताउँदै उनले त्यसमा चुनौती पनि रहेको प्रस्ट पारे । कम्युनिष्ट पार्टीले बहुमत ल्याउन नसक्ने भएकाले गठबन्धनको संस्कृतिलाई जोगाउँदै यसलाई पाँच वर्ष नै टिकाउने बताउँदै उनले यसका लागि सबै तयार रहनुपर्ने धारणा राखे ।
